Заврши првата фаза од реконструкцијата на  Психијатриската болница во Бардовци, со што обновени се  првото акутно одделение и одделението за психотерапија. Според Премиерот Никола Груевски реконструкцијата на објектот чинела 1,1 милион евра, а треба да продолжи на уште два објекта и вкупно ќе чини 2,5 милиони евра. „Во минатото имаше многу негативни коментари и извештаи за Македонија од меѓународните институции во врска со овој тип болници, дека тие не се во добра состојба и треба да се реконструираат. Имајќи го предвид тоа, но и реалната ситуација на теренот, ние преземавме мерки и инвестиравме средства со кои темелно ја реконструиравме оваа Психијатриска болница“, рече премиерот Груевски. Ова е првата фаза на инвестиции во вкупна вредност од 25 милиони евра во инфраструктурата во здравството, а како што рече Груевски, со градбата на новиот Клинички центар, реконструкцијата на трите згради кои ќе останат во рамки на Центарот, како и изградба на нова болница во Штип, севкупните инвестиции ќе достигнат 120 милиони евра.