Градските власти најавија проширување на проектот „Електра“ за користење на економични, еколошки и електрични возила за потребите на јавните претпријатија. Заедно со Владата најавија нов проект кој е веќе познат за државни субвенции за инсталирање плински уреди и електрични автомобили за граѓаните, а најавено е и набавување на 20 електрични зглобни автобуси со поголем капацитет за превоз на патници како и 30 мини автобуси исто така на електричен погон.

- Со набавката на 20-те дводелни електрични автобуси ќе се постигне истиот еколошки ефект како за изградба на трамвај кој чини неколкукратно поскапо, а и трамвајот и електричниот автобус имаа речиси нула загадување. Иако се планираше, трамвајот не се реализираше само заради високата цена која ја побараа сите производители и можни концесионери, и со која за да има приближно иста цена како автобусот, требаше две третини од цената да ја субвенционира државата, што заедно со инвестицијата за копање и поставување шини, како и набавка на возилата трамвај, ќе ја чинеше државата годишна субвенција меѓу 11 и 14 милиони евра во период од 30 години, најави Груевски. 

Градскиот татко Трајановски посочи дека електричните автобуси ќе ги намалат трошоците за гориво на ЈСП и ќе го намалат загадувањето. Сепак, се уште нема конкретни информации кога ќе започне набавката на 50 електрични возила за јавен превоз кои дефинитивно го откажуваат проектот за трамвај.