Чешка нема да прифати во 2016 година ниту еден мигрант, кој во моментов е во Турција, поради ситуацијата во земјата по пропаднатиот обид за државен удар, изјави министерот за внатрешни работи Милан Хованец, цитиран од Франс прес.

„Не знаеме што точно се случило во Турција, дали е државен удар или контра државен удар"- додаде тој.

Според договорот меѓу ЕУ и Турција, Чешка мораше да прифати од октомври 80 Сиријци кои се наоѓаат во моментов во бегалските кампови во Турција.

„Се плашам дека Турција не дејствува во поддршка на луѓето во Сирија, а се обидува да го реши конфликтот со Курдите"- посочи чешкиот министер.

Тој предупреди во овој контекст за опасност од дестабилизација на Турција.

„Ако договорот меѓу ЕУ и Турција пропадне, можеме да очекуваме оваа година слаб имиграциски бран, а следната година - многу поголема, напролет"- прогнозира Хованец.

Заладените односи на Европа со Анкара се влошија уште повеќе по пропаднатиот пуч на 15 јули, кој доведе до бранови од чистки, чии размери ги шокираа Европејците, а турскиот претседател Реџеп Таип Ердоган се закани дека ќе се повлече од договорот со ЕУ.