Откако видеата и сликите од јачината на разорниот земјотрес што ги погоди Турција и Сирија во понеделникот ја обиколија планетата, на местото на трагедијата пристигнаа бројни спасувачки екипи од целиот свет. Речиси и да нема спасувачка екипа која со себе не донела кучиња трагачи. Некои од нив стекнаа светска слава благодарение на нивните напори во кои пружија непроценлива помош во пронаоѓањето на преживеаните во бројни спасувачки мисии. Мексико, кое е подложно на земјотреси и има високо специјализирани цивилни и воени тимови кои често се распоредуваат за да помогнат при катастрофи, испрати некои од своите познати кучиња за потрага и спасување во Турција за да помогнат во потрагата по луѓето затрупани под урнатините.

Авион со 16 кучиња полета од Мексико Сити во вторникот, а мексиканскиот министер за надворешни работи Марсел Ебрард објави видео на Твитер, наведувајќи „срцето на нашиот спасувачки тим моментално лета за Турција.

Кучињата ги освоија срцата на Мексиканците за време на земјотресот во земјата во 2017 година, кога спасија многу животи, пишува Би-Би-Си. Жолтиот лабрадор ретривер по име Фрида стекна меѓународна слава кога беше видена како бара преживеани во Мексико Сити носејќи очила и чизми. Фрида е заслужна за спасувањето на 12 животи и лоцирањето на 40 тела во операциите низ Мексико, Хаити, Гватемала и Еквадор.

El corazón de nuestro equipo de rescate volando en estos momentos hacia Turquía : pic.twitter.com/fl82LCdJ13

— Marcelo Ebrard C. (@m_ebrard) February 7, 2023

За жал, Фрида почина од старост минатата година, но еден од нејзините придружници од земјотресот во Мексико во 2017 година е дел од тимот на мексиканската екипа што отпатува за Турција. Тоа е белгискиот Малиноа, во друштво на Орли, Тимба, Џули, Балам и Рекс.

Помош до луѓето во загрозеното подрачје испрати и Србија, а од урнатините како рамноправен член на Специјалистичката екипа за спасување е испратено и службеното куче на Министерството за внатрешни работи на Секторот за вонредни состојби „Пожарникарот Зиги“.

Зиги, кој има девет години, е белгиски овчар, обучен и квалификуван да бара и спасува живи луѓе од под урнатините и на отворен простор.

За Зиги се грижи водичот на кучето, Мили Радојевиќ, пожарникар-спасител и член на Специјалистичката екипа за спасување од урнатините, кој за своите подвизи во 2018 година доби медал за исклучителна храброст.

Една од земјите што испратија кучиња да бараат луѓе заробени во урнатините е Швајцарија. Организацијата REDOG, која обезбедува обучени волонтерски тимови со кучиња, го започна своето патување во Турција од оваа земја, работејќи со швајцарската влада и GEA - организација за пребарување и спасување со седиште во Турција.

Линда Хорнисбергер од оваа организација за Би-Би-Си изјави дека кучињата можат да бидат последна шанса за некои луѓе да се најдат. Нејзиното куче Тили учествуваше во пронаоѓањето на преживеани од земјотресот што ја погоди Албанија во 2019 година.

Во кинескиот спасувачки тим со 82 члена, четири кучиња спасувачи учествуваат во операциите за пребарување и спасување во опустошеното подрачје од земјотресот.

Хрватска, Чешка, Германија, Грција, Либија, Полска, Азербејџан, Јужна Кореја, Велика Британија и САД исто така користат кучиња.

Куче трагач од спасувачки тим од Азербејџан успеа да спаси девојка по име Зејнеп од урнатините под кои беше заробена во вторникот, една од многуте преживеани пронајдени од кучиња трагачи во областа погодена од земјотресот.

Животните често се користат во области каде што употребата на тешка механизација може да предизвика урнатините дополнително да се уриваат, доведувајќи ги во опасност животите на преживеаните.

Нивната мисија е „спасување животи“. Бидејќи кучињата можат да го детектираат мирисот на телата, како и оние кои се живи закопани под урнатините, се надеваме дека нивното брзо распоредување ќе резултира со спасување на што е можно повеќе преживеани. Со своите многукратно пософистицирани сетила, кои се речиси 40 пати поизразени во споредба со луѓето, кучето заменува до триесет луѓе во спасувачка операција на терен со поголема побарувачка.