Украинскиот претседател Виктор Јанукович е болен од грип и од денеска е на боледување, објави Олександар Орда, заменик раководител на на Државната медицинска администрација на Украина. „На претседателот на Украина му е издаден болнички упат заради силно респираторно заболување, придружено со висока температура“, објаснуваат здравствените власти. Јанукович се повлекува на боледување во екот на политичката криза која ја тресе неговата земја. Демонстрациите низ улиците на Киев и други украински градови продолжуваат и покрај оставката на премиерот Микола Азаров и поништувањето на контроверзните закони за ограничување на правото на протест. Пратениците во украинската Врховна Рада не успеваат да се договорат околу амнестијата на учесниците на протестите. Опозицијата бара и брзи претседателски избори, како и уставни измени со кои ќе се намалат овластувањата на претседателот на државата. Демонстрантите од Плоштадот на независноста во Киев вчера се организираа во Национална гарда. Украина се наоѓа на „работ на граѓанска војна“, а пратениците мораат да направат се за да се најде излез од кризата која ја тресе земјата од крајот на ноември, предупреди вчера и првиот претседател на независна Украина Леонид Кравчук.