Претседателот на Украина, Володимир Зеленски денеска изрази подготвеност да „работи под раководство“ на американскиот претседател Доналд Трамп за „да се постигне траен мир“ во Украина.

„Мојот тим и јас сме подготвени да работиме под раководство на претседателот Трамп за да постигнеме траен мир“, напиша Зеленски на социјалната мрежа Х, додавајќи дека сака да ги „разработи плановите“ со својот американски колега по нивната жестока расправија во петокот во Овалната соба на Белата куќа.

Се надева на конструктивна соработка. 

„Нашиот состанок во Вашингтон, во Белата куќа, не помина според планираното. Жално е што се случи ова. „Време е работите да се исправат“, рече Зеленски.

Зеленски предложи неколку чекори. 

„Првите чекори би можеле да бидат ослободување на затворениците и прекин на огнот на небото – забрана за ракети, беспилотни летала со долг дострел, бомби врз цивилна инфраструктура, вклучително и енергетска инфраструктура, како и прекин на огнот на море, доколку Русија го стори истото“, изјави украинскиот претседател.

Вели дека Украина е „благодарна“ за американската воена помош.

Американскиот претседател вчера нареди „пауза“ на американската воена помош за Украина, што е од клучно значење за способноста на Киев да се брани.

„Навистина цениме се што направи Америка за да и помогне на Украина да го одржи својот суверенитет и независност. И се сеќаваме кога работите се сменија кога претседателот Трамп (во неговиот прв мандат) испорача Javelins (американски противтенковски ракети) на Украина. „Ние сме благодарни за тоа“, рече Зеленски.

Украинскиот претседател додаде дека е подготвен „во секое време“ да го потпише планираниот рамковен договор со САД за експлоатација на украинските минерални суровини, чие потпишување е одложено откако влегоа во конфликт со Трамп. Европските лидери го поддржуваат Зеленски, но му посочија дека треба да ги среди односите со Трамп. 

Руската инвазија на Украина почна на 24 февруари во 2022 година.