Украинскиот претседател Володимир Зеленски синоќа објави дека силите на Киев повторно зазеле 30 заедници под контрола на Русија во североисточниот дел на земјата, каде Москва испраќа засилување за да се спротивстави на украинската контраофанзива.

„Украинските сили ослободија и презедоа контрола над 30 заедници во регионот Харков“, кој се граничи со Русија, рече Зеленски за време на неговото вечерно телевизиско обраќање поставено на платформите на социјалните мрежи. 

Тој додаде дека тешки борби се водат во Донбас, како што се нарекува источна Украина, како и во јужниот дел на земјата.

Киев објави дека украинските сили повторно го освоиле градот Купјанск, во источна Украина, во областа Харков. Овој град падна во рацете на Русите пред неколку месеци. Во исто време, воените дописници на странските медиуми објавија дека украинската армија го вратила и стратешки важниот град Изјум.

Русија ќе ги повлече своите сили од украинските градови Балаклија и Изjум, јави државната новинска агенција ТАСС во соопштението на Министерството за одбрана на Русија.

„За да се постигнат наведените цели на специјалната воена операција за ослободување на Донбас (регион во источна Украина), беше одлучено да се прегрупираат руските војници стационирани во регионите Балаклија и Изjум“, изјави портпаролот на Министерството, Игор Конашенков.

Брзото враќање на територијата од страна на украинските сили во Харков ја фати Русија на ранливо место на линијата на фронтот, а контраофанзивата се заканува на главниот центар за снабдување што го користи Москва во источна Украина, велат воените аналитичари.

Москва со месеци контролира околу една петтина од украинската територија на југ и на исток.