Украинскиот претседател Володимир Зеленски ги наведе црвените линии на Киев за мировните преговори, територијалниот интегритет и идните безбедносни аранжмани во интервју со британскиот водител Пирс Морган. Зеленски нагласи дека завршувањето на војната е непосреден приоритет – но не по цена на демократскиот легитимитет, територијалниот интегритет или веродостојните долгорочни безбедносни гаранции.

Зеленски истакна дека непредвидливоста на Русија е голема закана за иднината и мирот, заради што бараат гаранции кои ќе траат подолго од 20 години.

„Денес никој не може да ни даде цврст збор. Америка е силна земја и ни се потребни нивните безбедносни гаранции. Но, дури и со тоа, никој не може да ни каже ниту да ни даде збор дека Путин нема повторно да се врати“, изјави Зеленски.

Украинскиот претседател ги отфрли сите историски оправдувања за руската агресија. Според него, долготрајните дискусии за историските наративи или личности го одвлекуваат вниманието од итната задача за запирање на војната.

„Не ми требаат сите овие историски глупости за да ја завршам оваа војна и да преминам на дипломатија. Бидејќи ова е само тактика на одолговлекување на времето. Прочитав не помалку книги по историја од Путин. И научив многу. Знам повеќе за неговата земја отколку што тој знае за Украина. Едноставно затоа што бев во Русија во многу градови. Фокусот мора да биде на прекинување на борбите сега“, вели Зеленски. 

Зеленски вчера соопшти дека на украинско-американско-руските преговори во Женева за решавање војната е постигнат договор дека следењето на почитувањето на режимот за прекин на огнот ќе се врши со учество на Соединетите Американски Држави(САД), пренесе „Украинска правда“.

Руската инвазија на Украина почна на 24 февруари во 2022 година. 

фото Фејсбук/Володимир Зеленски