Не сум подготвен да дадам ниту еден дел од територијата во замена за мир, вели украинскиот претседател Володимир Зеленски. 

Тој во интервју за емисијата „60 минути“ на Си-би-ес,  рече дека е подготвен да се сретне со рускиот претседател Владимир Путин за ставање крај на војната.  Зеленски вели дека никогаш нема да го признае Крим како руска територија и покрај тоа што полуостровот беше анектиран од Русија во 2014 година.

Зеленски изјави дека Украинците си го бранат правото на живот.

„Никогаш не мислев дека ова право е толку скапо. Тоа се човечки вредности што Русија не може да избира што да правиме и како јас да ги искористам моите права. Тоа право ми го дадоа Бог и моите родители“, рече Зеленски.

Зеленски изјави и дека е подготвен да си го даде и животот за својата земја.

„Не сакам да изигрувам херој. Го сакам моето семејство. Сакам да живеам уште многу години, но помеѓу бегството и да бидам со мојот народ, секако дека сум подготвен да си го дадам и животот за мојата земја“, вели Зеленски.

Зеленски, најави одлучувачка битка во војната во Донбас, каде што се концентрирани голем број војници и опрема.

Русија на 24 февруари ја нападна Украина. Русите сметаат дека прашањето за Крим е затворено и за тоа воопшто не сакаат да разговараат. Освен Крим, тие бараат Украина да биде воено неутрална, да се денацифицира, а воедно бараат и припојување на Доњецк и Луганск, региони каде живее руското малцинство во Украина.