Премиерот на Обединетото Кралство Борис Џонсон денеска се извини за видеото на кое се гледа како неговиот персонал се смее на извештајот за забава на Даунинг стрит 10, за време на силниот локдаун поради ковид во 2020 година, велејќи дека е бесен затоа што му било кажано дека нема забава за сите.

„Исто така, бев бесен затоа што го видов тоа видео. Безрезервно се извинувам за навредата предизвикана од тоа видео и се извинувам за впечатокот што го остави клипот. Но, повторувам...кога се појавија гласините, неколку пати ме уверуваа дека нема забава и дека антиковид мерките не се прекршени“, изјави Џонсон, пренесе Ројтерс.

Британската телевизија „ИТВ њуз“ објави видео од минатиот декември, од кое се добива впечаток дека функционерите од кабинетот на британскиот премиер се шегуваат за одржување на божиќна забава на Даунинг стрит 10, само четири дена по настанот, во време кога на сила беа строги мерки за Ковид во ОК.

На видеото може да се слушне персоналот на кабинетот на премиерот Борис Џонсон како се смее и споменува „сирење и вино“, додека тогашната портпаролка на премиерот Борис Џонсон, Алегра Стратон, забележала дека „дефинитивно немало социјално дистанцирање“, додава Ројтерс.

Според Ројтерс, видеото од 22 декември 2020 година е проба за прес-конференцијата на Даунинг стрит, која Стратон требаше да ја води, а вработените во салата поставуваат имагинарни прашања за да и помогнат да се подготви.