Портпаролката на Белата куќа, Каролин Левит, изјави дека САД се блиску до остварување на клучните цели на воената операција „Епски бес“, во согласност со претходните проценки дека за тоа ќе бидат потребни меѓу четири и шест недели, објави „WSJ“.

Вели дека американската војска, 25 дена од почетокот на операцијата, е пред планираниот распоред.

„Најмоќната војска во светот секојдневно остварува извонредни резултати, иранскиот режим е сериозно ослабен, а неговата способност да претставува закана за САД и сојузниците е значително намалена“, рече таа.

Левит исто така тврдеше дека иранските амбиции за развој на нуклеарно оружје дополнително се ослабени, дури и повеќе отколку за време на операцијата „Полноќен чекан“ во јуни 2025 година.

„Повеќе од 9.000 непријателски цели се погодени досега, а иранските напади со балистички ракети и беспилотни летала се намалени за околу 90 проценти“, истакна таа.

Додаде дека САД „систематски ја разградуваат“ иранската одбранбена индустриска база, вклучително и напади врз подземни складишта за ракети и оружје, каде што за време на викендот биле користени и бомби со голема разорна моќ.

Левит наведе дека се уништени повеќе од 140 ирански пловила, вклучувајќи речиси 50 бродови за поставување мини, што, како што тврди, претставува најголемо уништување на една морнарица во толку краток период уште од Втората светска војна.

foto printskrin youtube