Руското Министерство за надворешни работи го оцени како „богохулење“ потегот оваа земја да биде една од ретките што нема да добие покана за присуство на погребот на кралицата Елизабета Втора в понеделник.

Руското МНР ја критикуваше одлуката да не биде поканета Русија на погребот на кралицата Елизабета Втора како „длабоко неморална“ и „богохулна“ кон споменот на починатиот монарх. 

Бакингемската палата објави дека одредени земји, вклучувајќи ги Русија, Белорусија, Авганистан, Бурма и Сирија, не биле поканети на државниот погреб на Елизабета, која почина на 8 септември на 96-годишна возраст по 70 години на тронот.

Портпаролката на руското МНР Марија Захарова изјави дека Русија го гледа „обидот да се искористи националната трагедија, која допре до срцата на милиони луѓе ширум светот, за геополитички цели и да се пресмета со Русија“.

Русија сепак претходно потврди дека доколку некој замине на погребот, тоа нема да биде претседателот Владимир Путин кој „нема планови да учествува на кој било меморијал или на која било друга церемонија“.

Повеќе од 2.000 гости се очекува да бидат присутни во Вестминстерската опатија на 19 септември на црковна служба посветена на нејзиниот живот и владеење.