Францускиот суд го отфрли барањето на група која ги претставува француските муслимани, за поништување на одлуката на општината на Кан за забрана на буркина - костим за  капење, кој го покрива целото тело и коса, пренесоа американските медиуми.

Адвокатот на групата наречена колектив против исламофобијата во Франција, изјави дека ќе поднесе жалба прашањето во Државниот совет - највисока административна инстанца на Франција.

Истовремено, по одлуката на Кан за забрана на буркина слично решение има и друга општина на Азурниот брег, градот Вилнев-Лубе, пренесе Франс прес. Веста ја соопшти лично градоначалникот, Лионел Лока претставник на десничарската партија на Републиканците.

Тој ја аргументира одлуката дека не е соодветно одењето со буркина на плажа во општиот контекст во земјата. Додаде дека морале да ја забранат и од хигиенски причини.

Франција, која ја има најголемата муслиманска заедница во Европа, во последните 18 месеци стана цел на три големи напади и на уште неколку напади на радикализирани муслимани, што доведе до зголемување на тензиите во однос на муслиманите.