Откако администрацијата на американскиот претседател Барак Обама стави вето на судската одлука за забрана на продажба на iPhone во САД, вредноста на „Samsung“ падна за 1 милијарда долари пишува „Wall Street Journal“.

Покрај изгубената вредност, „Samsung“ се соочува со можна забрана за продажба на свои уреди во САД. Во петок ITC ќе разгледува друг случај по поплаки од „Apple“ за прекршени патенти, со кој е можно да се забрани продажба на Samsung Galaxy S, Galaxy S II и Galaxy Tab 10.1 во САД. Како и во случајот со „Apple“, „Samsung“ ќе има 60 дена за да се обжали кај американскиот претседател.

Властите на САД изјавија дека ќе ја следат внимателно таа одлука, а нивните колеги од Јужна Кореја изјавија дека одлуката на ITC околу легалните битки меѓу двете компании можат да предизвикаат и политички проблеми. Аналитичарите на WSJ се согласуваат со јужнокорејските власти, објаснувајќи дека ќе се предизвикаат проблеми во трговијата меѓу двете земји, ако со претседателско вето му се даде предност на „Apple“ пред „Samsung“.

Претходно Интернационалната трговска комисија на САД (ITC) пресуди дека „Apple“ прекршил патенти на „Samsung“ за безжично 3G пренесување на податоци на повеќе уреди во исто време. Одлуката значеше дека ќе се забрани продажба на iPhone 4, iPhone 3, iPhone 3GS и iPad 3G и iPad 2 3G моделите кои ги продава AT&T во САД.