Џим Вотсон, градоначалникот на главниот град на Канада, прогласи вонредна состојба поради протестите на возачите на камиони против задолжителните вакцини и другите ограничувања за Ковид. Протестот трае повеќе од една недела, а Вотсон рече дека градот е „целосно надвор од контрола“ и дека има повеќе демонстранти отколку полицајци.

Тој ги нарече демонстрантите „закана за безбедноста на граѓаните“, пренесува BBC News. 

Возачи на камиони со своите возила и шатори го парализираа центарот на градот. Да потсетиме, „Конвојот на слободата“ започна како движење против барањето на владата сите возачи на камиони да се вакцинираат против Ковид.

Во интервју за канадското радио CFRA Вотсон рече дека демонстрантите се однесуваат „несоодветно“, додавајќи дека „постојано трубеле и активирале огномет“ и „се однесуваат како да се на забава“. „Очигледно е дека сме побројни и ја губиме оваа битка. Треба да го свртиме тоа и да го вратиме градот под контрола“, додаде Вотсон.

Полицијата со опрема за немири упадна на собирот во петокот, отстранувајќи стотици демонстранти со камиони.

Градоначалникот не прецизираше какви мерки би можел да воведе, но полицијата вчера соопшти дека би можеле да преземат поригорозни активности од претходно, што би можело да вклучи апсење на оние кои им помагаат на демонстрантите.

Вонредната состојба ќе им даде дополнителна моќ на градските лидери, според Би-Би-Си. Во соопштението од градот се вели дека прогласувањето на вонредна состојба „одразува сериозна закана и закана за безбедноста на граѓаните поради протестите и ја нагласува потребата да се поддржи правосудниот систем и другите нивоа на власта“.

Многу граѓани на Отава го изразија своето незадоволство од протестите. Тие се жалат на камиони кои го нарушуваат сообраќајот и новоизградените импровизирани дрвени конструкции во градските паркови. Полицијата соопшти дека е загрижена што конвојот привлекол екстремно десничарски и екстремистички делови од општеството, според Би-Би-Си.

Во неделата потврдија дека истражуваат повеќе од 60 пријави поврзани со протестот, почнувајќи од нарушување на јавниот ред и мир, преку кражби и оштетување на туѓ имот, до злосторства од омраза. Повеќе луѓе се уапсени. 83% од Канаѓаните се вакцинирани против Ковид, а повеќето граѓани ја поддржуваат задолжителната вакцинација.

Протестите во Отава се чести, но вакви досега не биле видени

Би-Би-Си во анализата на настаните наведува дека канадскиот главен град, во кој е сместен и парламентот, е навикнат на протести, но началникот на полицијата во Отава во неколку наврати изјавил дека нема преседан за протести како Конвојот на слободата, барем во однос на организацијата и финансирање.

Нема сомнеж дека демонстрантите се „закопаа“ и немаат намера да се откажат, а во изминатите два викенда им се придружија илјадници луѓе кои ги поддржуваат. Бидејќи крајот на протестите не се гледа, полицијата мора да се справи и со фрустрациите на граѓаните на Отава, од кои многумина се прашуваат зошто не е сторено повеќе за да се стави крај на протестот кој го парализираше центарот на градот.

Демонстрантите се соочуваат и со потенцијални тужби за непрестајното трубање кое трае со часови секој ден, иако организаторите рекоа дека ќе се обидат да ја ограничат вревата со трубање само во текот на денот.

Организатори: Ќе останеме онолку колку што е потребно

Прогласувањето на вонредна состојба е само последен во низата обиди на градските власти да извршат притисок врз демонстрантите, но сè уште не е јасно како сето тоа ќе заврши заедно. Што се однесува до организаторите на протестот, тие ветија мирен протест согласно законот, но порачаа дека „ќе останат онолку колку што е потребно“.

Протестот беше поттикнат од одлуката да се воведе обврска за вакцинација против Ковид за сите возачи на камиони кои ја минуваат границата меѓу САД и Канада. Демонстрантите потоа почнаа да се собираат во центарот на Отава, во близина на зградата на парламентот, а нивните барања во меѓувреме пораснаа - од напуштање на одлуката за задолжителна вакцинација како услов за преминување на границата до укинување на сите задолжителни одлуки за вакцинација низ целата земја.

Демонстрантите главно се против владата на премиерот Џастин Трудо. Во петокот, поранешниот американски претседател Доналд Трамп го поддржа протестот, нарекувајќи го Трудо „екстремно левичарски лудак“ кој „ја уништи Канада со лудо пропишување мерки против КОВИД“.

Според неодамнешното истражување на јавното мислење спроведено од Abacus Data, 68% од канадските испитаници рекле дека имаат „многу малку“ заедничко со демонстрантите, додека 32% рекле дека имаат „многу“ заедничко со возачите на камиони кои протестираат во Отава.

фото: printscreen video index.hr