Протести се одржаа во различни делови на главниот град на Венецуела, Каракас поради недостигот на храна, стоки и услуги.

Демонстранти се судрија со полицијата во Каракас во услови на остри тензии поради политичката и економската криза во земјата, пренесе ДПА. Протестите против недостигот на прехранбени производи се претворија во насилство и полицијата употреби солзавец против демонстрантите кои се обидоа да стигнат до претседателската палата. Националниот сојуз на новинари соопшти дека 11 новинари се претепани и ограбени.

Венецуела е зафатена од тешка економска криза, која дополнително ги заострува политичките тензии меѓу социјалистичката влада на претседателот, Николас Мадуро и опозицијата, која држи мнозинство во парламентот по изборите во декември.

Рестрикциите на струјата и недостатокот на хранливи производи станаа секојдневие, а инфлацијата во земјата е меѓу највисоките во светот, забележуваат агенциите.

Опозицијата се стреми да го тргне од власт претседателот Мадуро со референдум. Минатиот месец таа собра 1,85 милион потписи за поддршка за референдум и го обвинува Националниот изборен совет дека намерно ја одолговлекува постапката.