Шефот на дипломатијата на Европската унија, Јосеп Борељ, денеска изјави дека ставот на ЕУ за иднината на Русија се променил во изминатите 48 часа.

Тој исто така изјави дека политичката нестабилност и внатрешната кревкост на таа нуклеарна сила ја зголемува воената опасност што Москва веќе ја претставува.

„Сега е јасно дека нашата визија за Русија е сосема поинаква. Тоа не е само закана бидејќи има воена способност да предизвика војна, што веќе ја покажа, туку и внатрешна политичка нестабилност“, истакна Борељ по состанокот на Советот на министри во Луксембург, пренесува „Гардијан“.

Според него, ситуацијата останува сложена и непредвидлива, но заклучокот од дебатата е јасен и министрите за надворешни работи на ЕУ ќе продолжат да ја поддржуваат Украина „повеќе од кога било“.

„Потребно е време да се развие стратегија, имајќи ја предвид таквата состојба. Работиме на тоа. Мислам дека можеме да кажеме дека сите веќе ги анализираат можните сценарија што би можеле да се развијат, но немаме готова стратегија. - додаде Борељ.

Тој изјави дека ЕУ е загрижена поради промената на улогата на платениците на „Вагнер“, кои претходно беа поддржани од рускиот претседател Владимир Путин во клучните делови на Африка, особено во Мали и Централноафриканската Република.

Борељ претходно го опиша водачот на платениците на „Вагнер“, Евгениј Пригожин, како „чудовиште што се сврте против својот творец“.