Медиумите јавуваат, повикувајќи се на МВР, дека безбедносните сили ликвидирале 26 учесници на протестот, а околу 3.000 се приведени во немирите кои избија оваа недела во Казахстан, а иницијална каписла беше поскапувањето на гасот.

Казахстанскиот министер за надворешни работи Мухтар Тлеуберди детално го информирал американскиот државен секретар Ентони Блинкен за „антитерористичката“ операција. Засега е познато дека во Казахстан ќе пристигнат и пет авиони со миротворци од Белорусија.

Заменик-шефот на претседателската администрација Даурен Абаев за ТВ „Хабар-24“ изјави дека на страната на „терористите“ дејствувале и снајперисти.

Демонстрантите неколку пати се обиделе да се вклучат во директната програма на националната телевизија, а двапати нападот на ТВ кулата Кок Тобе беше одбиен.

„Вкупно 3.000 лица се уапсени поради прекршување на наредбата, 26 се ликвидирани, а 18 вооружени терористи се ранети“, објави телевизијата.

Според МВР, загинале 18 припадници на безбедносните сили, а ранети се 748 полицајци и припадници на Националната гарда.

Абаев додаде дека засега е познат еден случај на обезглавување на кадет.

Казахстанските власти воведоа црвен, критичен, степен на терористичка опасност на териториите на целата земја, соопшти прес-службата на Комитетот за национална безбедност.

Во Алма-Ата учесниците во немирите подигнаа барикади пред зградата на телевизијата „Свет“, јавуваат медиумите, додавајќи дека има жртви и дека телата на загинатите лежат на улица.

Немири имаше и во градот Актау, каде демонстрантите ја нападнаа полицијата и им го одзедоа оружјето.

Аеродромите во главниот град Алма-Ата и другите градови и денеска се затворени, додека Интернетот беше во функција извесен период.

Божиќните богослужби се одржаа без присуство на верници, а џамиите беа привремено затворени.