Светската здравствена организација очекува за неколку дена да има повеќе информации за тоа колку е заразен новиот сој на корона - омикрон, изјави вчера техничкиот директор на СЗО Марија ван Керхове.

Во соопштението се посочува дека СЗО ќе има податоци за омикрон многу побрзо од очекуваното, бидејќи Женева претходно соопшти дека ќе бидат потребни недели за да се добијат податоците, пренесе Ројтерс.

Некои од главните прашања се дали сојот е позаразен или избегнува заштита од вакцини и треба да се чекаат одговорите, се додава.

Ван Керхове рече дека едно можно сценарио е новиот вид да е позаразен од доминантниот вид делта, но додаде дека сè уште не е познато дали омикрон предизвикува потешка форма на ковид.

Главниот научник на СЗО, Соумја Сваминатан, рече дека агенцијата верува дека постоечките вакцини против ковид делуваат и против новиот вид.

Таа посочи дека во најголем ризик се лицата постари од 45 години кои имаат коморбидитети.

Новиот вид на омикрон корона вирус во Северна и Јужна Америка досега е регистриран во Канада и Бразил, но голема е веројатноста и други земји наскоро да ја откријат оваа варијанта во оптек, објави Панамериканската здравствена организација (ПАХО).

„Сè уште не е познато дали омикронот е позаразен од другите варијанти или предизвикува посериозни болести“, рече директорот на PAHO, Кариса Етјен.

Таа додаде дека е потребно време да се тестира нов сој, пренесува Ројтерс.

„Брзината и транспарентноста се особено важни во моментов. Но, пред сè, ги повикуваме сите луѓе да не се плашат“, рече таа.