Корисниците на јавниот превоз во градот Гвајакил во Еквадор ќе можат да „платат“ автобуски билет со пластични шишиња. 

Овој пристанишен град, кој се наоѓа во југозападниот дел на Еквадор, е втор најнаселен град во државата со 2,7 милиона жители, но создава најмногу отпад. 

Новата шема насочена кон борбата против отпадот и загадувањето им овозможува на луѓето да разменуваат пластични шишиња што може да се рециклираат за пари за купување автобуски билети. 

„Замислете: два центи за шише, за 15 шишиња добивате 30 центи - тоа е билет за „Метровија“ - вели еден патник. 

Еден 76-годишен пензионер кој живее надвор од Гвајакил плаќал 9 долари за такси за да стигне до градот. Вели дека сега со пластичните шишиња може да си дозволи автобуски билет. 

Гвајакил создава 4.200 тони отпад на ден, а  од него само 14 отсто се рециклираат. 

За два месеци се собрани повеќе од 24.000 шишиња од патниците.