Поради глобалното затоплување, комарците се повеќе летаат на север. Научниците со години го следат движењето на овој инсект носител на болести низ Европа, но ефектите врз здравјето на луѓето се уште се нејасни. Сега, истражувачите во Велика Британија започнуваат голем проект за проценка на ризикот од болести што ги пренесуваат комарците во Шкотска според сегашните и идните сценарија за климатски промени.

„Важноста од проучување на вектори на комарци и нивните патогени, во свет каде климата се менува, не може да се прецени“, вели Хедер Фергусон, професорка на Универзитетот во Глазгов.

Заедно со Агенцијата за здравствена безбедност на Обединетото Кралство (UKHSA) и Центарот за екологија и хидрологија на ОК (UKCEH), на универзитетот му беше доделен грант од 1,25 милиони фунти (1,41 милиони евра) за спроведување на истражувањето во текот на три години. 

Проектот, исто така, ќе ги следи птиците преселници за да ги забележи новите зоонозни патогени - болести кои преминуваат од животните на луѓето, како што е вирусот Западен Нил.

Азиските тигрести комарци се шират на потопли температури

Азиските тигрести комарци се озлогласени носители на сериозни болести, вклучувајќи денга, чикунгуња, вирусот Западен Нил и Зика.

Климатските промени значат дека овој високо инвазивен вид напредува низ медитеранските земји. Се очекува тие да бидат воспоставени низ Англија и Велс во наредните децении, пишува Euronews .

Да не заборавиме дека комарците се најсмртоносните суштества во светот, кои годишно убиваат милион луѓе преку болестите што ги пренесуваат. Во последните 50 години, инциденцата на денга треска во светот е зголемена за 30 пати. Четириесет проценти од светската популација, околу три милиони луѓе, живеат во области со ризик од денга.