Србинката Јелена Јовиќ која работи како туристички водич во агенцијата „Jungle Travel“ и моментално е во Маракеш со 18 туристи, вели дека ситуацијата е катастрофална и дека има многу луѓе на улиците низ Мароко.

Оваа земја доцна во петокот беше погодена од земјотрес со јачина од 6,8 степени според Рихтеровата скала, при што загинаа над 2.000 луѓе.

„За жал, ваквата состојба може да се види низ целата земја, многу луѓе се на улиците, особено во вечерните часови, така што навистина сочувствуваме со луѓето од Мароко. „Навистина е страшно ова што се случува, но генерално продолжуваме според планираното и верувам дека тоа ќе продолжи и за следните тури во септември“, вели таа.

Според нејзините информации, со летовите се е редовно и според планираното, а групата туристи кои моментално престојуваат во Мароко треба да се вратат во Србија во петок наутро.

За набавката на храна, струја, вода вели дека се е сосема редовно и под контрола. Според неа, српските туристи доживеале земјотрес на влезот во хотелот.

„Се вративме од стариот дел на Маракеш, каде што се случија повеќето уривања. Влегувавме во хотелот, некои веќе влегоа во собите кога почна земјотресот и снема струја. Почна паника и неверување и сите излеговме надвор, првите неколку часа по земјотресот бевме надвор. Имаше многу луѓе на улица, настана паника, нашите патници се смирија... се вративме да спиеме, но на долните катови. Многу луѓе се на улица, сочувствуваме со луѓето во Мароко... Ги следиме и сите вести и сакаме да веруваме дека повеќе нема да има земјотреси“, вели Јелена Јовиќ.

Страшна ситуација во Мароко

Спасувачите се уште трагаат по преживеани во Мароко по разорниот земјотрес во кој загинаа повеќе од 2.000 луѓе. Билансот на жртвите не е конечен. Најголеми штети и жртви има во тешко достапните планински области. ОН, ЕУ и владите ширум светот најавуваат помош.

А бројот на повредени надмина 2.060, од ​​кои повеќе од 1.400 се во критична состојба.

Повеќето од смртните случаи се регистрирани во оддалечените планински области на југот на Мароко.

Билансот на жртви не е конечен, а спасувачите се уште пристигнуваат во најзагрозените подрачја. Тие бараат преживеани под урнатините на куќите, историските и верските објекти.

Епицентарот на земјотресот бил на 70 километри југозападно од Маракеш, во планините Висок Атлас.

„По поставувањето на кампот во базата, нашата екипа прво ќе оди на увид на теренот. Мора да земеме со нас кучиња кои ќе бараат преживеани по урнатините“, вели Анке Платнер од германската Федерална агенција за техничка помош.

Историските објекти во тој град беа тешко оштетени. Кралот Мохамед Шести прогласи тридневна национална жалост, наредувајќи да се отворат засолништата и да им се пружи потребната помош на преживеаните, од кои многумина поминаа втора ноќ на отворено.

„Моите деца се плашат и затоа останав со нив наместо да одам на работа. Нема храна во продавниците, страдаме од глад и жед“, вели Мухамед од Маракеш.

Фото: EPA-EFE/YOAN VALAT