Француската влада објави нова Национална стратегија за храна, исхрана и клима (Snanc) до 2030 година, во која им препорачува на граѓаните да ја ограничат потрошувачката на месо и преработена храна и да преминат на поздрава исхрана што има помало влијание врз климатските промени. Текстот поврзан со месото беше спорен долго време, бидејќи Министерството за земјоделство инсистираше на зборот „ограничување“, додека Министерството за екологија сакаше текстот да вели „намалување“, објавува Figaro- пренесе Б92.

Целта е постепена промена на навиките во исхраната, што значи повеќе овошје, зеленчук, мешунки, јаткасти плодови и интегрални житарки во менито, како и доволно риба и млечни производи, но и намалување на потрошувачката на увезено месо. Препораките се дел од поширока политика заснована на резултатите од Граѓанската конвенција за климатски промени и Законот за клима и отпорност од 2021 година. Планот е овие мерки да се спроведат до 2030 година, со цел да се намалат емисиите на стакленички гасови од храната и да се подобри здравјето на населението.