Брегот на Слоновата Коска го потврди првиот случај на хеморагичен вирус ебола во последните 25 години, соопштија во саботата одделно министерот за здравство и Светската здравствена организација (СЗО).

Министерот за здравство Пјер Димба изјави на националната телевизија дека станува збор за изолиран случај на 18-годишна девојка која допатувала од соседна Гвинеја.

Светската здравствена организација во соопштението тврди дека Брегот на Слоновата Коска го потврди првиот случај на ебола во земјата од 1994 година.

„Ова се случи откако Институтот Пастер на Брегот на Слоновата Коска ја потврди вирусната болест „Ебола“ во примероците собрани од пациент, кој беше хоспитализиран во трговскиот главен град Абиџан, по пристигнувањето од Гвинеја“, се вели во соопштението на СЗО.

СЗО рече дека првичните испитувања откриле дека пациентката патувала до Брегот на Слоновата Коска копнено и пристигнала во Абиџан на 12 август.

„Пациентот беше примен во болница откако доживеа треска и во моментов е на лекување“, се вели.

Гвинеја - место на епидемија на ебола 2014-2016 година, најсмртоносна досега - доживеа четиримесечна појава на ебола претходно оваа година, која беше прогласена за завршена на 19 јуни.

Гвинеја на почетокот на оваа недела, исто така, го потврди првиот случај на вирусот Марбург во Западна Африка. Вирусот Марбург е многу заразна хеморагична треска слична на ебола.