Сведоците на нападот во кој загинаа пет лица, а 18 други беа повредени во геј клуб во Колорадо Спрингс ги опишаа застрашувачките сцени на кои биле сведоци.

Клубот Кју - каде што се случи инцидентот - се рекламира како „ноќен клуб ориентиран кон возрасни кој е домаќин на тематски вечери како што се караоке, драг шоуа и диџеи“.

Снимката споделена на страницата на социјалните мрежи ја покажува брзата реакција на полицијата и итните служби, со автомобили наредени на улиците надвор од клубот.

Неколку часа по хоророт, полицијата во Колорадо Спрингс потврди дека пет лица загинале, а 18 други се повредени во пукање во клубот „Кју“. Еден осомничен е приведен. Тие се уште не откриваат во каква состојба се хоспитализирани.

Нападот се случи на Денот на сеќавањето на трансродовите луѓе, кој се одбележува секоја година на 20 ноември за да се сеќава на секој што е убиен како резултат на трансфобија.

Шанкерот на клубот „Кју“, Мајкл Андерсон, за „Мирор“ раскажал за ужасите на кои бил сведок додека напаѓачот дивеел низ клубот.

- Се плашев дека ќе умрам. За малку ќе ме застрелаа, кога истрелите престанаа. После минута или две не бев сигурен дали е готово или не, па станав и решив да трчам. Најдов човек како лежи на подот и тој беше застрелан во вратот - изјави Андерсон.

Габи Лама (32), која го посетува клубот од својата 19-та година, изјави за Мирор дека таа и нејзините пријатели донеле „одлука во последен момент“ да не го посетуваат местото синоќа.

Таа рече дека Club Q е еден од ограничениот број ноќни клубови кои се грижат за ЛГБТК+ заедницата во Колорадо Спрингс.

– Клуб Кју отсекогаш бил мирна енергија полна со љубов – рече таа.

На прашањето како се чувствува откако ја слушна веста, Габи рече: - Бесна. Со скршено срце. Не сум сигурна дека би можела да се вратам таму и да не бидам вознемирена цело време. 

- Чувствувам дека нашиот свет оди наназад наместо нанапред.

Инцидентот потсетува на пукањето во ноќниот клуб Орландо Пулс во 2016 година, кога вооружен маж упадна во ноќен клуб за хомосексуалци во Флорида, убивајќи 50 луѓе, а рани уште најмалку 53 други.