Ерменците масовно излегоа денес на улиците на главниот град Ереван откако премиерот Никол Пашинјан ја обвини војската за обид за пуч.

Од 45-годишниот Пашинјан се бара оставка поради, како што тврдат неговите критичари, погубното отстапување во крвавиот шестнеделен судир на азербејџанските и ерменските сили лани.

„Немаме непријатели во Ерменија. Имаме само браќа и сестри“, додаде премиерот.

Тој е под притисок на опозицијата откако Азербејџан ја порази Ерменија во војната за покраината Нагорно Карабах, која заврши со договор за прекин на конфликтот на 10 ноември и со кој Азербејџан доби големи делови од територијата во планинската зона на Кавказот. Пашинјан е поранешен новинар кој дојде на власт во мирната револуција во мај 2018 година и одбива да отстапи и покрај протестите на опозицијата. Кажа дека ја презема одговорноста за она што се случи, но дека сега треба да се врати безбедноста на земјата. Русија, земја која им е сојузник со воена база објави дека е загрижена околу тензиите во поранешната советска република и повика на смирување. 

Во регионот Нагорно - Карабах, Ерменците ги напуштија своите домови, ги запалија, а ги откопаа и гробовите и ги пренесоа телата на своите предци. Азербејџанците уништуваа верски храмови во местата кои Ерменците ги напуштија. 

foto EPA-EFE