Поради поплавите во Пакистан, една третина од земјата е под вода. Поплавите „збришаа“ цели села. 

Најмалку 1.136 луѓе загинале од почетокот на сезоната на монсуните во јуни. Поројните поплави ги разорија патиштата, домовите и нивите. 

„Сето тоа е еден голем океан, нема суво копно за испумпување на водата“, рече министерот за клима, Шери Реман, нарекувајќи ја „криза од незамисливи размери“.

Од оние за кои се знае дека загинале, 75 починале само во изминатите 24 часа. 

Во изјава за Би-би-си пакистанскиот министер за надворешни работи Билавал Буто-Зардари изјави дека за една третина од жртвите се верува дека се деца.

Обилните води во северната долина Сват во земјата ги однесоа мостовите и патиштата, отсекувајќи цели села. Илјадници луѓе што живеат во планинската област добија наредба да се евакуираат.