Во стариот град на Ерусалим и околу него денеска имаше судири меѓу израелски полицајци и групи Палестинци, кои протестираат против одлуката на САД да го признаат градот за престолнина на Израел, јави ДПА.

Илјадници Палестинци учествуваа во прогласениот „Ден на гневот“, по завршувањето на петочната молитва во ерусалимската џамија Ал Акса, дојдоа до вратите на стариот град, извикувајќи „Ерусалим е наш, Ерусалим е нашиот главен град“, како и „Немаме потреба од празни приказни, имаме потреба од камења и калашникови“.

Демонстрантите носат транспаренти со слогани: „Повик за сите муслимани! Ерусалим е престолнина на калифатот“ и веат знамиња на палестински организации.

Во текот на молитвите, имамот го прогласил Ерусалим за исламски град, а говорел и за „гневот“ и „големата болка“ која ја чувствува муслиманската заедница поради одлуката на американскиот претседател, Доналд Трамп, да го признае Ерусалим за главен град на Израел.

Учесниците во молитвата со аплауз ги поздравија повиците на имамите.

Најмалку 26 демонстранти се повредени на Западниот Брег во појазот Газа и источен Ерусалим, во текот на вториот „Ден на гневот“ кој го прогласија палестинските водачи поради одлуката на претседателот на САД.

Повеќето од демонстрантите на Западниот Брег се повредени со гумени куршуми, но има и ранети со боева муниција. Од границата со појасот Газа, еден демонстрант во критична состојба бил пренесен во болница.