Нападите во претежно христијанскиот град Сукајлабија во покраината Хама се најновите во серијата напади насочени кон припадници на христијанското малцинство во Сирија. Многу христијани ја напуштија земјата од почетокот на конфликтот пред 15 години, во кој загинаа околу половина милион луѓе.

Нема информации за можни жртви во нападите што траеја до раните утрински часови во саботата. Десетици мажи на мотоцикли од блискиот сунитски град Калаат ал-Мадик нападнаа христијански имот, објавува Асошиејтед прес.

„Поминавме низ состојба на терор, страв и паника“, рече Лиан Двеир, чија продавница за облека беше изрешетана со куршуми и тешко оштетена. 

Неговите деца биле преплашени за време на нападот што траеше со часови.

Двеир забележа дека расправијата меѓу жителите на Сукајлабија и еден човек од Калаат ал-Мадик довела до тоа десетици мажи од тој сунитски град да ја нападнат областа и да нападнат продавници, куќи и автомобили.

Друг жител на Сукајлабија, Нафех ал-Надер, рече дека младите му ја скршиле влезната врата и удриле во дизел грејач, предизвикувајќи една соба да се запали. Тие се обиделе да запалат друга соба, но не успеале бидејќи еден сосед дошол да помогне, по што еден од напаѓачите го удрил со стап.

Владините сили донесоа засилување во Сукајлабија и го задушија насилството. Стотици жители излегоа на улиците во саботата барајќи одговорност и најавија штрајк додека сторителите не бидат казнети.

Од падот на Асад во декември 2024 година, членовите на малцинствата Алавити, Друзи и христијани се изложени на напади од вооружени групи лојални на новите муслимански власти