Организацијата „Исламска држава“ ја презеде одговорноста за нападот со нож во предградие на Париз, каде маж уби две лица, а едно е сериозно повредено.

Иако беше објавено дека едно лице е убиено, а двајца се ранети, потоа француски официјален претставник изјави дека две лица загинале и дека третото е потешко рането.

Двајцата загинати во нападот се мајката и сестрата на напаѓачот, информира полициски претставник во изјава за локални медиуми.

Локалните медиуми објавија дека напаѓачот викал „Алах акбар“ и ги нападнал минувачите. Човекот потоа се затворил во куќа, по што полицијата го убила.

Во соопштение објавено од новинската агенција на терористичката група, Амак, е наведено дека напаѓачот е „борец на ИД”.

Напаѓачот од претходно им е познат на безбедносните служби и е запишан на списокот со поединци што се закана за националната безбедност, познат како „Карта С“, за поттикнување тероризам, според локалните медиуми.

Нападот се случи во Трап, сиромашно предградие на Париз.