Ирачките безбедносни сили, помогнати со воздушните напади од меѓународната коалиција, го постигнаа најголемиот напредок против Исламската држава во последните неколку месеци, заземајќи го во целост градот Џурф ал-Сахара, во близина на Багдад. Во исто време, курдските сили повторно го вратиле северноирачкиот град Зумар и неколку села во близина. Курдските борци наишле на силен отпор, но успеале да победат, а властите објавија дека Зумар веќе е во курдски раце. Зумар беше првиот курдски град што во август го зазедоа припадниците на Исламската држава. Заземањето на Џурф ал-Сахара, пак, е најголем напредок за ирачките безбедносни сили во последните неколку месеци жестоки борби за ова подрачје, особено затоа што градот се наоѓа во непосредна близина на Багдад и е стратешки важна локација. Целосна контрола врз овој град им овозможува на ирачките власти да го задржат пробивот на џихадистите кон главниот град на Ирак, но им ја прекинува и врската со западната покраина Анбар. „Денеска успеавме терористите од Исламската држава да ги протераме од Џурф ал-Сахара и да истакнеме ирачко знаме на владината зграда“, рекол покраинскиот гувернер Садик Мадлул. САД и сојузниците вчера извеле 22 воздушни напади врз силите на Исламската држава во Ирак, а ги уништија и топовските сили на џихадистите кај Кобане во Сирија. Како изгледаат тие операции, погледнете на следниот ЛИНК.