Aмериканската сојузна држава Ајова ја погодија неколку торнада и зад себе оставија пустош.

Најмалку 17 луѓе се повредени, а предизвикана е катастрофална штета, јавија американски медиуми.

На Интернет се објавени застрашувачки снимки од торнада, кои ги погодиле градовите Маршалтаун, Пела и Бондурант. Повредени се 10 лица во Маршалтаун и 7 во една фабрика близу Пела.

Најлошо било во Маршалтаун, град со 27 000 жители, каде торнадо корнело кровови од згради, урнало купола од зградата на судот, а оштетена е и локална болница.

Жителката Стефани Мос изјавила дека била во продавница во центарот на градот со сопругот и двомесечното бебе кога слушнале аларм за торнадо.

Се сокриле во подрум на зграда и слушнале „како пукаат ѕидовите, како да има експлозија“. Продавницата е уништена.

„Преживеавме. Среќна сум“, рекла Мос. Метеоролозите рекле дека торнадото се формирало одеднаш и ги изненадило.