Германскиот генерал-мајор Кристијан Фројдинг ја анализираше операцијата во Курск на украинските сили и проценува дека Украина распоредила четири бригади (од 4.000 до 6.000 војници) за офанзивата.

Од украинската територија ги поддржуваат од 2.000 до 4.000 војници преку логистика и противвоздушна одбрана.

Генералот ја проценува длабочината на заробената територија на околу 30 километри, а ширината на околу 65 километри.

„Ние ја проценуваме вкупната површина на која дејствуваат украинските сили – не контролираат, туку дејствуваат – на околу 1.000 квадратни километри. Ова е интересно бидејќи тоа е приближно територијата што украинските војници ја загубија од Русите од почетокот на годината“, рече генерал-мајор Кристијан Фројдинг.

Тој додаде дека Русија се обидела да се спротивстави на украинскиот напад со пешадија, оклопни возила и специјални сили, како и масовни артилериски и воздушни напади, „сепак, тоа сè уште не вродило со резултат“.

Генералот проценува дека Украина заробила „голем трицифрен, ако не и четирицифрен број руски воени заробеници“.

Меѓу целите на операцијата во регионот Курск, смета Фројдинг, може да биде да се намали притисокот од Русија на првите линии во Украина, што е психолошки ефект „ако војната се префрли подлабоко во Русија“.

„Потенцијално е можно да се искористи заземената територија за политички преговори во иднина“, анализира германскиот генерал.