Најмалку 150 лица загинале, а повеќе стотици се повредени во низа бомбашки напади во Хомс и кај храмот во близина на Дамаск, за кои одговорноста ја презеде Исламска држава, додека Вашингтон и Москва работат на обезбедување на прекин на огнот во Сирија.

Најмалку 59 лица, од кои повеќето цивили загинале а повеќе десетици се повредени во Хомс во експлозии на бомби подметнати во два автомобили, соопшти Сириската опсерваторија за човекови права.

Нешто подоцна 96 лица се убиени, а речиси 200 повредени во низа напади, вклучувајќи и експлозии на автомобили-бомби во близина на шиитскиот храм Саид Заинаб јужно од Дамаск, јави БиБиСи повикувајќи се на сириските државни медиуми.

Одговорноста за нападот на шиитскиот храм ја презеде Исламска држава, која минатиот месец ја презеде одговорноста и за нападите во кои се убиени најмалку 70 лица во истиот храм.

Во меѓувреме, американскиот државен секретар Џон Кери рекол дека е постигнат рамковен договор за примирје.

Светските сили се залагаат за крај на борбите во Сирија и постигнале договор за примирјето кој треба да стапи на сила во петокот но постојат раминувања околу неговото спроведување.

Американскиот државен секретар изјавил дека разговарал со рускиот колега Сергеј Лавров и дека со него се договорил како да го спроведат примирјето.

-Постигнавме рамковен договор за условите за завршување на непријателските активности кој би можел да стапи на сила во наредните денови-изјавил Кери во Аман.

МНР на Русија соопшти дека Кери и Лавров синоќа уште два пати разговарале по телефон и дека се договориле околу додатните параметри поврзани со прекин на огнот во Сирија.

-Двете страни се договорија за додатни параметри за режим на прекин на огнот во Сирија. За резултатите на разговорите ќе бидат информирани претседателите на Русија Путин и САД Обама стои во соопштението на министерствата.

Тоа бил третиот телефонски разговор на двајцата дипломати во неделата и четврт во изминативе два дена.