Британскиот јавен сервис БиБиСи објави денес колку заработуваат неговите најплатени ѕвезди, а на врвот на листата е водителот Крис Иванс, со годишна плата поголема од 2,2 милиони фунти.

Плата поголема од 150 000 фунти годишно, повеќе од британскиот премиер имаат 96 вработени.

Висината на заработката е објавена во платни групи, а не во точен износ.

Иванс, водителот на БиБиСи радио кое кратко време ја водеше популарната емисија „Топ гер“ во која Џереми Кларксон доби отказ, заработува помеѓу 2,2 и 2,5 милиони фунти годишно.

Домаќинот на емисијата „Match of the day“, поранешниот фудбалер Гери Линкер прима годишна плата помеѓу 1,75 и 1,8 милиони фунти.

На листата најдобро платени водители две третини се мажи, а најплатената жена заработува помалку од четвртина од платата на Иванс.

Клаудија Винклеман, со најдобра заработка меѓу жените, добива помеѓу 450 000 и 500 000 фунти.

Големи разлики во платите постојат и помеѓу белците и црнците, и припадниците на други етнички групи.

Меѓу нив најплатени се новинарот и водидетл Џорџ Алаги од Шри Ланка, радио и тв водителот со пакистанско потекло Џејсон Мухамед и ди џејот и водител, Тревор Нелсон. Тие заработуваат помеѓу 250 000 и 300 000 фунти годишно.

Ова е прв пат да се објавени платите на БиБиСи ѕвезди кои заработуваат повеќе од 150 000 фунти.

БиБиСи е јавен сервис кој го финансират граѓаните, односно секоја куќа која има телевизор или гледа БиБиСи онлајн. Претплатата изнесува 147 фунти годишно.