Ватикан, најмалата земја во светот, очекува да добие доволен број вакцини за коронавирус во наредните денови со цел да ги вакцинира сите свои работници и жители.

Околу 450 луѓе живеат во Ватикан, вклучувајќи го и папата Франциско, а уште неколку стотици вработени живеат во Рим.

„Вакцините најверојатно ќе пристигнат во земјата во втората недела од јануари во доволни количини за да се задоволат потребите на Светиот Престол и државата Ватикан“, се вели во соопштението.

Вакцинацијата ќе започне во втората половина на јануари и приоритет ќе имаат вработените во јавното здравство и безбедноста, старите лица и вработените кои се во чест контакт со јавноста, пренесува Ројтерс.

Вакцинацијата ќе биде доброволна. Ватикан не објави дали и кога ќе биде вакциниран 84-годишниот Папа, кој на мала возраст поради болест загубил дел од дробовите.

Досега во Ватикан се регистрирани 27 случаи на коронавирус и никој не починал од последиците на болеста.