Во Москва започнаа меѓународните клинички испитувања на еднофазната вакцина Спутник лајт, објави ТАСС, повикувајќи се на изјава на градоначалникот на руската престолнина Сергеј Собјанин, на неговиот блог.

-Денес започнуваме меѓународни клинички испитувања на вакцината Спутник лајт. Потребна е само една посета на пункт за вакцинирање со Спутник лајт. Имунитетот почнува да се развива по една недела и достигнува максимум четири недели по вакцинацијата, напиша Собјанин.

6.000 луѓе ќе учествуваат во тестовите за вакцини - 3.000 во Русија и 3.000 во ОАЕ.

Спутник лајт веќе ја помина првата фаза на тестирање. Сите вакцинирани развија имунитет на КОВИД-19. Сепак, сè уште нема официјални точни проценки за ефикасноста на вакцината. Според директорот на рускиот Фонд за директни инвестиции, Кирил Дмитриев, ефикасноста е од 73 до 85 проценти.

Во Москва, секој возрасен граѓанин може да биде имунизиран со Спутник лајт, доколку нема медицински контраиндикации и доколку веќе не бил вакциниран со Спутник V, пренесува ТАСС.

Според директорот на центарот Гамалеја, Александар Гинзбург, имунитетот против КОВИД-19 по вакцинацијата со Спутник лајт трае 4-5 месеци. Појаснува и дека, за разлика од Спутник V, еднофазната вакцина само ја намалува веројатноста за развој на тешка форма на болеста, но не ја исклучува инфекцијата.