Грците стражарат пред своите домови и се обидуваат да ги спасат од шумски пожари кои го уништуваат островот Евија, и не сакаат да си заминат иако властите повикуваат на нивна евакуација, додека пожарникарите осми ден по ред се борат со пожарот.

Пожарникарите се подготвени за силен ветер што може да предизвика повеќе пожари на вториот по големина грчки остров. Владата наскоро треба да објави мерки за помош на жителите кои останаа без своите домови и имот. Но, за некои Грци, напуштањето дома пред пожар не е опција.

„Се плашиме, но мора да останеме“.

"Полицијата дојде и ни рече да го евакуираме селото Авгарија, но ние не можеме, тоа е наша сопственост. Не можеме да дозволиме да ни изгорат домовите", изјави 55 -годишниот Јоанис Агелопулос, сопственик на продавница за каросерии во Истијаја северно од островот.

Локалната жителка Јоана Метаксиоти (59) се приклучи на патролата: „Се плашиме, но мора да останеме“.

Одобрени се 500 милиони евра помош за островот Евија и регионот Атика.

Грчкиот премиер Кирјакос Мицотакис им се извини на Грците во понеделникот за неуспехот на владата во гаснењето на пожарите откако ја сфати големината на штетата.

Тој во вторник ќе одржи состанок со министрите, по што владата ќе објави специјални мерки за помош на оние што ги загубија своите домови, фарми и имот во пожарите.

Мицотакис одобри 500 милиони евра помош за островот Евија и регионот Атика во близина на Атина во понеделникот и вети дека ќе ги обнови шумите уништени во пожарите.

Делови од шумите на Атика, Евија и Пелопонез беа изгорени, покажуваат сателитските снимки на Сентинел-2. Националната опсерваторија во Атина проценува дека до недела изгореле 650.000 хектари.

Во Грција гореа повеќе од 500 пожари, принудувајќи десетици села и илјадници луѓе да се евакуираат. Речиси 1.000 пожарникари, девет Канаѓани и 200 возила беа испратени да и помогнат на Грција од други европски земји.