Русија го предупреди НАТО дека доколку Финска и Шведска се приклучат на воената алијанса, таа ќе преземе акција на Балтикот.

- Не може повеќе да се зборува за статус без нуклеарно оружје на Балтикот - мора да се воспостави рамнотежа. Русија до денес нема преземено такви мерки и немала намера – изјави Дмитриј Медведев, пренесува Ројтерс.

Во неговата објава на телеграм, Медведев истакнува дека ако Шведска и Финска се приклучат на НАТО, должината на копнените граници на Алијансата со Русија ќе се удвои повеќе.

-Се разбира, овие граници ќе треба да се зајакнат. „Сериозно зајакнување на копнените сили и воздушната одбрана, како и распоредување на значителни поморски сили во водите на Финскиот залив. Во тој случај не се зборува за ненуклеарен статус на балтичките земји - мора да се воспостави рамнотежа. Русија досега не преземала ниту имала намера да преземе такви мерки. Ако сме принудени - внимавајте - не го предложивме ние тоа, пишува на Телеграм заменик-претседателот на Советот за безбедност на Русија Дмитриј Медведев.

Финска и Шведска вчера направија голем чекор кон пристапување во НАТО, откако нивните премиери изјавија дека руската инвазија на Украина го промени „целиот безбедносен пејзаж“ на Европа и „драматично го обликуваше начинот на размислување“ во нордиските земји.

Финската премиерка Сана Марин изјави дека нејзината земја, која дели 1.300 километри граница со Русија, ќе одлучи дали ќе поднесе барање за пристапување во алијансата „прилично брзо, за неколку недели, а не за месеци“, и покрај ризикот да ја налути Москва.