Пратеничката група на Зелените во Европскиот парламент испрати покана до властите во Србија да изнесат официјален став за Русија и нејзината агресија врз Украина.

Како што дознаваме, Зелените одржале состанок претходната вечер на кој разговарале за Србија и нејзиниот однос кон Русија и војната во Украина. Во оваа прилика, како што се наведува, ќе испратат покана до Европската народна партија (ЕПП), чиј придружник е СНС.

Пратеничката на Зелените во Европскиот парламент, Гвендолин Делбо-Корфилд, на Твитер напиша дека е неприфатливо и дека е потребно српските власти да воведат санкции кон Русија, како што тоа го направија земјите-членки на ЕУ.

„Владата испрати опасна порака со тоа што не ги почитува санкциите на Европската унија против Русија. Во исто време, знаеме дека повеќето Срби се против војната и дека многумина веќе излегоа на улиците за да протестираат против украинската инвазија“, напиша таа.

Да потсетиме, неодамна пратениците на Европскиот парламент од групата „Обнови ја Европа“ испратија писмо до шефицата на Европската комисија Урсула фон дер Лајен и високиот претставник на ЕУ за надворешна политика и безбедност Жозеф Борел, предупредувајќи на високи нивоа на автократија во Србија, проблеми со слободата на медиумите и говорот, како и фактот дека владеењето на правото во таа земја постојано опаѓа. Тие предупредуваат дека кулминација на се е одбивањето на Србија да се усогласи со ставот на ЕУ за Русија и предлагаат поради тоа привремено да се замрзнат пристапните преговори.

Извор: Нова.рс