Украинските производители на оружје ги добија првите воени дозволи за извоз на својата стока во странство, објави секретарот на украинскиот Совет за национална безбедност и одбрана, Рустем Умеров.

Киев неодамна донесе политички чувствителна одлука за извоз на оружје додека води војна против Русија, барајќи средства за проширување на својата домашна одбранбена индустрија и обидувајќи се да го искористи своето иновативно оружје како инструмент за дипломатско влијание за зајакнување на своите сојузи, објави Ројтерс.

Во објава на социјалните мрежи, Умеров не прецизираше кои компании ја добиле лиценцата, но рече дека годишниот производствен капацитет на Украина во одбранбениот сектор надминува 55 милијарди долари.

Извор запознаен со ситуацијата изјави за Ројтерс дека се одобрени десетици барања за извоз.

Украина има ограничени буџетски ресурси, но акумулирала огромно искуство на бојното поле и иновативно оружје за време на четирите години војна со Русија, соопшти агенцијата.

Киев се обиде да собере пари од сојузничките влади и инвеститори за својата домашна одбранбена индустрија и да воспостави заеднички производствени иницијативи со странски компании.

„Ни требаат инвестиции за производство на беспилотни летала што им се потребни на нашите момци на бојното поле денес“, изјави вчера украинскиот претседател Володимир Зеленски.

Како дел од таква иницијатива, беспилотни летала веќе се произведуваат во Велика Британија, а Зеленски рече дека наскоро ќе го прими првиот украински дрон произведен во Германија, каде што се очекува да присуствува на Минхенската безбедносна конференција овој викенд.

Украинскиот претседател рече дека на форумот ќе разговара за извозот и понатамошните заеднички производствени капацитети.

Умеров, исто така, изјави дека меѓуресорската владина комисија што одобрува извоз на оружје веќе го одржала својот прв состанок по осум месеци.

Од рускиот напад во февруари 2022 година, одбранбениот сектор на Украина доживеа бум и сега вклучува повеќе од 1.000 компании, од кои повеќето се стартапи во приватниот сектор.

Зеленски неодамна изјави дека Украина има 450 производители на беспилотни летала, а малите и евтини беспилотни летала сега се одговорни за поголемиот дел од нападите врз целите на првата линија.

„Во областите на беспилотни летала, електронско војување и извидување, нашите капацитети веќе го надминуваат обемот на домашните набавки“, рече Умеров.

Тој заклучи дека координираниот извоз му овозможува на Киев да привлече инвестиции, да го зголеми производството и да лансира нови технологии за украинската војска.