Украинскиот министер за одбрана Иван Федоров испрати остро предупредување до Москва, тврдејќи дека украинската кампања со беспилотни летала веќе дава конкретни резултати и дека Крим сè повеќе го изолираат од руските снабдувачки правци.

Федоров во неодамнешно интервју изјави дека со нападите со дронови се одвива изолација на Крим и дека во блиска иднина полуостровот може да биде претворен во остров, што, според него, би можело да донесе неочекувани последици за Русите.

Украинскиот министер тврди дека руските сили на окупираниот полуостров влегуваат во сè потешка положба. Тој порача дека логистиката е прекината, дека Крим е изолиран и дека слични процеси се случуваат и на истокот.

Неговите најави доаѓаат во период кога украинските сили за беспилотни системи го засилуваат притисокот врз клучните руски правци за снабдување. Нападите со дронови со среден дострел, според украинската страна, сериозно ја нарушиле руската воена логистика и снабдувањето со гориво, поради што окупациските власти на Крим неодамна вовеле ограничувања за потрошувачката на гориво.

Роберт Бровди, командант на украинските беспилотни сили познат под кодното име „Маџар“, изјави за „Ројтерс“ дека со едномесечната кампања со дронови сообраќајот на автопатот Новоросија, важна руска воена рута низ окупираниот југ на Украина кон Крим, е намален за повеќе од две третини.

Бровди тврди дека Украина во рок од еден месец би можела да воспостави целосна контрола врз тој пат. Според него, целта е Крим да биде изолиран, а нападите врз руските возила на оваа делница ги спореди со гаѓање препелици на отворено поле.

Руската инвазија на Украина почна на 24 февруари во 2022 година.