Украинската влада одобрила воведување на пакет од 26 видови санкции во однос на Русија, изјавил украинскиот премиер Арсениј Јаценјук, пренесуваат српски медиуми.

„Кабинетот на министрите на Украина го одобри нацрт-законот за воведување на санкции. Ова е прв пат во историјата на Украина, кога ние како држава преземаме санкции во однос на странски субјекти кои вршат злосторства против нашата земја и нашите граѓани“, изјавил украинскиот премиер. Меѓу санкциите се замрзнување на средства, забрана за вршење на дејност, забрана за приватизација на државната сопственост, забрана за користење на лиценци, како и целосна и делумна забрана за транзит на ресурси.

Владата на Украина до Советот за национална безбедност и одбрана (СНБО) испратила листа со санкции, во која има 172 граѓани на Русија и други земји, како и 65 правни лица, од кои повеќето руски, додава украинскиот премиер.