Помеѓу 22 и 25 милиони луѓе моментално живеат на териториите под контрола на Киев, изјави украинскиот министер за социјална политика, семејство и единство Денис Уљутин.

Оваа проценка, според украинските медиуми, укажува на драматичен демографски пад во споредба со периодот откако Украина доби независност во 1991 година, кога имаше околу 48 милиони жители. Во пресрет на војната, во 2022 година, населението се проценуваше на приближно 41 милион.

Уљутин изјави дека, покрај населението на териториите под контрола на Киев, околу три милиони луѓе се наоѓаат на териториите под руска контрола, вклучувајќи го и Крим.

Според него, главните причини за намалувањето на населението се војната, масовното иселување на граѓаните во странство, внатрешното раселување, како и долгорочната демографска криза што ја оптоваруваше Украина уште пред војната.

Украинскиот министер ја опиша ситуацијата како „катастрофална“, особено со оглед на бројот на корисници на социјална помош и пензија на територијата под контрола на Киев. Според украинските медиуми, во земјата има околу 13 милиони корисници на социјална помош и повеќе од 10 милиони пензионери.

Уљутин рече дека некои од раселените граѓани би можеле да се вратат само откако ќе заврши војната или ќе се воспостави потрајно примирје, но нагласи дека оваа одлука ќе зависи од безбедноста, достапноста на станови, работни места и реконструкцијата на инфраструктурата.