Украина очекува руски тенковски напад врз главниот град Киев подоцна во текот на денот, што може да стане најтешкиот ден во војната досега, изјави советникот на украинскиот министер за внатрешни работи.

Антон Херашченко рече дека бранителите на Киев се подготвени и дека имаат многу противтенковски ракети испорачани од странски сојузници. И заменик-министерот за одбрана на Украина се согласи со оценката дека руските сили денеска би можеле да влезат во области недалеку од Киев.

Украинците кренаа во воздух мост на 50 километри северно од Киев

Тој додаде дека единиците на украинската армија ги бранат позициите на четири боишта и покрај нумерички супериорен непријател. Украински воен претставник, исто така, рече дека украинските сили успеале да ги одбијат руските војници во близина на Чернихив.

Ова се совпаѓа со извештајот на украинското Министерство за одбрана, кое претходно соопшти дека воздушните трупи го кренале во воздух мостот на реката Тетерив во Иванкив, на околу 50 километри северно од Киев, во обид да ги спречат руските трупи да напредуваат кон главниот град.

Министерството соопшти дека рускиот напредок е запрен.