Украина ги демантира тврдењата дека Русија го зазела градот Суџа во регионот Курск. 

„Борбите во рускиот регион Курск сè уште траат, а вестите за заземањето на градот Суџа од страна на руските сили не се точни“, изјави Андриј Коваленко, раководител на Центарот за борба против дезинформации при Советот за национална безбедност и одбрана на Украина.

Вели дека засега информациите за тоа дека градот паднал во руски раце не се точни.

Претходно, секретарот на украинскиот парламентарен комитет за национална безбедност, одбрана и разузнавање, Роман Костенко, изјави дека украинските вооружени сили не се целосно повлечени од Суџа и Курск.

Украинскиот претседател Володимир Зеленски денеска потврди дека украинските сили продолжуваат со своите операции во регионот и дека военото раководство прави сè за да ги заштити животите на војниците. 

Украина е спремна за примирје, но нема да ги признае окупираните територии како руски.