Знаевме дека војната ќе трае долго, вели канадскиот премиер Џастин Трудо. 

Трудо изјави дека земјите од Г7 се свесни дека војната во Украина ќе трае долго и дека се подготвени да го поддржат Киев додека е потребно. За темпото на актуелната украинска контраофанзива, тој кажа дека лидерите на Г7 „секогаш знаеле дека војната ќе биде долг процес“.

„Секако од разговорите што ги имавме во Г7 и НАТО, ние сме подготвени за војна која ќе трае онолку колку што е потребно, бидејќи не можеме и не смееме да дозволиме Русија да победи“, рече тој во интервју за Блумберг.

Овие изјави се дадени во време на почетокот на преговорите меѓу Украина и Канада за билатерален договор за долгорочни безбедносни обврски.

Во ризик се и други земји освен Украина. Заменик-претседателот на Советот за безбедност на Русија и поранешен претседател Дмитриј Медведев деновиве изјави дека Русија може да ги анектира отцепените грузиски региони, Абхазија и Јужна Осетија.