Кога започна целосната руска инвазија на Украина во февруари 2022 година, рускиот претседател Владимир Путин го опиша она што го смета за брза операција и заземање на Киев како „специјална воена операција“. Речиси три и пол години подоцна, Кремљ сè уште се држи до тој термин.

Официјалното објавување војна би имало далекусежни последици за руската економија и индустрија, а исто така би овозможило и целосна мобилизација. Но, дури и делумната мобилизација во септември 2022 година предизвика масовни протести во Русија, со што му стана јасно на Путин дека секој понатамошен чекор би носел сериозни политички ризици.

„Путин се заштити себеси држејќи ги последиците од војната подалеку од мнозинството од населението“, рече Каролина Хирд од Американскиот институт за проучување на војната.

По украинската операција „Пајажина“, се појавија информации за притисоци одвнатре, заедно со барања од тврдокорните луѓе Путин да објави војна и со тоа да овозможи ескалација на конфликтот и да го префрли целиот систем во воен режим на функционирање. Сепак, експертите интервјуирани од „Киев Индепендент“ веруваат дека ова е малку веројатно.

Според нивните проценки, руската индустрија и економија веќе функционираат како да се во воена состојба, а Путин не може да си дозволи да ја изгуби политичката контрола со спроведување непопуларна мобилизација.

Објавувањето војна би значело целосно ориентирање на економијата кон одбраната и производството на оружје и повик за општа мобилизација. Иако Русија годинава издвои 6,3 проценти од БДП за одбрана – најмногу од Студената војна – ова е сè уште далеку од нивото на целосна воена мобилизација. За споредба, Украина минатата година потроши 34 проценти од својот БДП за одбрана, додека Обединетото Кралство потроши повеќе од 50 проценти за време на Втората светска војна.

Оваа бројка ја наведе рускиот амбасадор во Лондон, Андреј Келин, во интервју за CNN како доказ дека Русија сè уште спроведува „специјална воена операција“, а не војна.

Руската инвазија на Украина почна на 24 февруари во 2022 година.