Францускиот претседател Емануел Макрон остро реагираше на изјавите на американскиот претседател Доналд Трамп, кој за време на велигденски ручек во Белата куќа даде лични и контроверзни коментари за неговиот приватен живот.

Макрон порача дека нема да се впушта во такви дискусии и оцени дека ваквите изјави се „непристојни и не се на нивото“.

Не сакам да навлегувам во тоа. Зборуваме за премногу сериозни работи – за војна, за луѓе кои се борат, за цивили кои умираат. Ова не заслужува одговор – изјави Макрон.

Тој нагласи дека вниманието треба да биде насочено кон деескалација на конфликтите и дипломатско решение, а не кон лични напади.

Што точно изјави Трамп?

Трамп, на настан во Белата куќа, прво ги критикуваше Макрон и британскиот премиер Кир Стармер, велејќи дека понудиле помош дури откако конфликтот бил решен.

Реков: „Не, не, не ми треба помош откако војната е добиена, Емануел“ – изјави Трамп.

Но, тука не застана. Тој изнесе и лична забелешка за францускиот претседател и неговата сопруга Брижит Макрон:

Ја повикав Франција, го повикав Макрон. Неговата сопруга се однесува многу лошо кон него и тој сè уште се опоравува од удар во вилицата – рече Трамп.

Овие коментари предизвикаа бурни реакции, бидејќи се однесуваат на приватниот живот на францускиот претседател.

Контекст: Видеото

Трамп најверојатно алудираше на видео од минатата година, кога Макрон и неговата сопруга пристигнаа во официјална посета на Виетнам. Во моментот на отворање на вратата од авионот, камерите снимија сцена во која рака (најверојатно на Брижит Макрон) го оттурнува лицето на претседателот.

Макрон потоа се насмевна и ги поздрави присутните, а од неговиот кабинет подоцна објаснија дека станува збор за „момент на блискост“, а не за конфликт.

Случајот отвори нова дипломатска тензија, но и прашања за границите на политичкиот говор во време на сериозни глобални кризи.