Доналд Трамп во вторникот си ја обезбеди победата на внатрепартиските избори во Републиканската партија во американската држава Западна Вирџинија, соопштија CNN и NBC, но сеуште без да даваат конкретни податоци.

Во Западна Вирџинија се распределуваат гласовите на 34 делегати за републиканскиот партиски конгрес. Гласаат и членовите и приврзаниците на републиканците во Небраска, каде гласовите за конгресот се 36.

Трамп веќе не се бори со ривалите, а се обидува да добие што е можно поголема претходна поддршка во трката за номинацијата на неговата партија.

Конгресот ќе се одржи меѓу 18 и 21 јули во Кливленд, Охајо. Откако на почетокот на месецот - на 3 и 4 мај - од кампањата се повлекоа главните конкуренти на Трамп - сенаторот од Тексас Тед Круз и гувернерот на Охајо Џон Кейсик - милијардерот фактички си обезбеди издигнување за кандидат на претседателските избори од страна на републиканците.

Во меѓувреме кај демократите Берни Сандерс запиша симболична победа во Западна Вирџинија. Сандерс сепак заостанува сериозно од Хилари Клинтон - тој си обезбедил 1454 делегати наспроти 2228 за Клинтон, на која и требаат уште само 155 гласови за да победи во номинацијата на демократите.

Според последните податоци на социолозите, добиени по гласањето и објавени веднаш по затворањето на избирачките места, поддршката за Сандерс е 46%, а за Хилари Клинтон - 40%. Резултатот од трката меѓу сенаторот од Вермонт и поранешната државна секретарка на САД се совпаѓа со анкетите на јавното мислење, извршени пред гласањето во Западна Вирџинија.

Спорот тука меѓу демократите е за 32 делегати за конгресот на кој официјално ќе биде издигнат кандидатот за Белата куќа, зад кој ќе застане Демократската партија.